Hmeltha thlalak bawm…a hlimawm zawngin
Mizo hmeichhe thlalak
Mizo nula chhelo – nge ‘chhe lo’ zawk
Internet leh facebook vela tawngkam lar tak pakhat chu ‘chhe lo’ or ‘chhelo’ tih hi a ni. Tlangvalin nula hmeltha a tih deuh a hmuhin ‘chhelo’ or ‘chhe lo’ tawngkam hi a hmang chawk bawk. Mizo nula chhelo tih tur nge Mizo nula chhe lo tih tur zawk ? Chhelo tih hi a dik nge a dik lo zawk ? Pu KD Pathak. Internet-ah hian Mizo nula tlangval zingah ‘chhe lo‘ tia chhu lut aiin ‘chhelo’ tia chhu an tam zawk hial awm e. Chuvangin he thumal ziak dan dik hi zir leh sawiho tham a tling.
Mizo tawng ziak (ziah) dan dik hi hriat a har a ni ang e, Mizote ngei pawh hian kan hre fuh lo thei hle a, kan hriat dan pawh a inang lo thei hle bawk. School zirlaite tan pawh hian dik deuha ziak hi thil huphurhawm tak a ni thei a, han hrilh ngial pawhin an hrethiam zung zung lem lo bawk. Zirlaibu siamtute leh zirtirtute an pawimawh hle.
He laiah hian a khawi nge dik ? Khawi nge dik lo ? Mizo nula chhelo leh Mizo hmeichhe chhelo tih tur nge Mizo nula chhe lo, leh Mizo hmeichhe chhe lo tih zawk tur tih sawi kan tum lem lo. He miin a tihchian em em Mizo tawng hi a punctuation dik hmang tur leh internet khawvela kan thil chhut luhte a lo dik zawk theih nan hian school level-ah Mizo tawng hi nasa taka zir a ngai a, ziak dan dik zirtir bakah tawngkam dik leh dik lo awm thei thlengin zir a pawimawh hle tih tarlan leh chumi zawnga school pawimawhzia hi tarlan kan tum zawk a ni.
Vawiin ni leh khawngaihthlakawm hman lar em emna khawvelah hian ‘dawn nia‘ leh ‘dawn a nia‘ awmzia leh inan lohna pawh hre hrang lo mithiam tak anga lang leh Mizo celebrity zingah te, film lehlin lama hnathawktute zingah te, an sulhnnute belhchian dawl lo thil lian tham tak takin a nawh pawr an tam tawh. A chhan nia lang chu zirna inah hian uluk tawkin Mizo tawng hi zirlai naupangte hnenah zirtir a ni ta lo thin a ni maithei.
‘Na‘ hman dan takngial pawh thiam lo kan tam a ni ang ‘Mizo hmeichhe chhelo post na‘ tih pawh hi a lar ta em mai. ‘Na’ hian a hma thu a zawm leh zawm loh azirin a awmzia a danglam daih thei tih ngaihtuah miah lo pawh kan tam hle awm e. Chumai a ni lo, tawngkam mak tak ‘Mizo hmeichhia chhelo post na‘ tih te hial a awm a, Mizo ‘hmeichhia‘ leh ‘hmeichhe‘ pawh hre hrang lovin ‘hmeichhia thlalak‘ tih leh ‘hmeichhe thlalak‘ tih thlengin a awm ta nuk a nih hi. Mizo Hmeichhe Insuihkhawm Pawl (MHIP)-in ‘hmeichhia’ tih aia ‘minu’ hman an duh zawk kha chu la changkang zawk tak a ni.
‘Dawn nia’ tih hmanna tura ‘dawn a nia’ tih hlir hman nachang hria an pun zelna Mizoramah hian ‘Mizo hmeichhia chhelo’ tih chu Mizo incheina changkang tak zawk a la ni thuai ang a, ‘Mizo hmeichhia chhia lo’ (hmeichhia ni ve si mipa anga inngai ni mai awma mawi) thlengin kan la nei lovang tih sawi a har. School mawh a va sang em !
Mizo nula piannalh tih te, Mizohmeichhia piannalh tih te, Mizo hmeichhia hmeltha tih thlengin Mizo chhul chhuak kutchhuak ngei hmuh tur a awm ta nuk mai. Mizo nula hmeltha thlalak-te chu chutiang hmun hming mak tak takah chuan hmuh tur a awm leh tuar si ang. ‘Hmeichhia‘ modified form ‘hmeichhe‘ hman hun hre lo tan chuan ‘piannalh‘ ti-a chhut tur nge ‘pian nalh‘ tia chhut zawk tur tih hriat a huphurhawm ang. Phone leh computer-ah a bik takin Mizo nula leh tlangvalte pawhin thu kan chhu nasa ta a, a awlsam zawng ngaihtuahna avanga a dik a dawk thlu lo lekin rawra chhut tluka uluk pawhin kan chhu peih ta hlawm lo. Hei hian Mizo tawng a tibawrhbang nasa tih loh rual a ni lo. Tam tak tan chuan a ngaimawhawm (ngaihpawimawihawm ni lovin) loh mai thei, ngaimawh leh ngaihpawimawh zawng a inang miau lova. Engpawh ni se, naupan lai atanga zirtirna mumal leh tha tawk dawng lote kan ni hlawm ni berin a lang. Engtiangin nge Mizo zirlai chu Mizo tawng zirtir an nih tih hi school dinhmun tehkhawng pawimawh tak pakhat a ni.
Mizoram tourist attractions and the school
Mizote hian hmun pawimawh kan sawi ban theih loh neih tlemte zinga mi chu Rihdil hi a ni. Mizo thu leh hla tam taka kan hmuh thin heng hmun pawimawhte hi Mizo zirlaite hian a hmun ngeia an hmuh hi school zirtirtute duhthusam a ni fo ang. Beng hriatna mai ai chuan mita hmuh ngei hian thinlunga thil chhinchhiah a tichiang nge nge thin. Tawnhriat neih tam hi nakin maia puitling la ni turte tan hian tihmakmawh a ni awm e. Hetiang kawngah hian zirna inte hian mawh an phur tui hle.
Continue readingLet’s go dancing, children (Mizote hi kan lo lam thiam khawp mai)
‘Duat lam ila’…’Ka lam thiam lo..’ ..’Thing leh lutuk mai’. ‘Zan dang pawha lam lova zanin khera i lam le’.
Lam hi Mizo zingah a mikhual lo. Khawvel pum hian a hmelhriatna a rei tawh mai. Xmas lawmna zaikhawmna, biak ina Pathian fakna,…aaa hun pawimawh tam takah hian lam chu a tel. Thlaraumi tehfung pawimawh tak pakhat atan Mizo Kristian-te hian kan hmang. Zaikhawmnaa lam thei lo, kut tak ngial pawh beng hlei thei lo chu ’tisa mi’ kan ti mathlawn lo. Sawi sawi lovin han lam mai teh. A huhova lam te, mahni chauha lam te, a vai hian lam a ni vek mai.
Lamnaa thawmhnaw hak hi a inang lo thei khawp mai. Thenkhatin thawmhnaw fual delh dulh an hak laiin a hun leh hmun leh lam dan style azirin thenkhat chuan pawnfen chhing leh kekawr bul tei tawi pawh inthuam nan an hmang bawk. A pawimawh lai chu lam dan leh a hmun nen dress chu a inhmeh em tih hi a ni. Biak in chhunga lamnaah kekawr bul emaw pawnfen chhing tak hak a mawi lo. Taksa khuh tam deuh chi thuamhnaw nena lam a mawi ang. Hmun thenkhatah erawh chuan thawmhnaw fual delh dulh chuan lam a tibuai thei a, a inhmeh tur dress thlan thiam a ngai. Mizo hmeichhiate ang lo takin khaw thlang sap-ho leh celebrity thenkhat chu uchuak takin an inchei a, thawmhnaw nei zo lo ang hialin a then te phei chu saruak deuhthaw tein an awm thin. Sap zaithiam hmeichhe thenkhat khuan intihlar nan leh mipui hip nan ruak kengkung leh sexy uchuak taka inchei chunga a hur herh zawnga mipui hmaa inlan an ching. Mizo hmeichhiate hian inchei dan mawi tawk hriat a tul a, Mizo nula chu chhungril nun chhuan tham nei a ni tur a ni. Nula thenkhat chuan Sap-ho tih dan an entawn nge Mizo nula saruak thlalak niawm tak pawh hmuh tur a awm ta fo mai hi a tha lem lo hle. Hmasawnna chuan danglamna a thlen thin a, Mizo incheina pawh hian danglamna kawng a zawh zel a, hunin a rawn her chhuahpui thil thenkhat chu dan beh tum luih pawha theih reng reng loh thil a ni a, a hun lai mil erawh hriatthiam a pawimawh ang.
Hmeichhiate chauh hi an lam thiam bik lo. Mipate hlei glei hi a lam thiam thiam an ni ve tho. Tam tak chuan Mizo mipa zangkhai taka han lam deuh at at emaw nem no zeta han inthlep kual vel chu a pa lo tihna an nei thei maithei. Mahse, engkim a hun leh hmun azira tih thiam hi mi puitling zia a ni. Mi a lam chuan a lam dan style azirin no deuh nghelh nghelha thlek deuh nghet nghet pawh a ngai maithei. Mipa nih vanga khawng leh Arnold-a ang maia men rum ul reng chu a finthlak ber loh tawp ang ang.
Hmaikawr vuah chunga lam hi mi zakzum deuh tan chuan a tihchi fu maithei. Kekawr tlawn ha chunga han insawi nghin dal dal leh han inlek deuh vak vak pawh a remchan hun a awm phian thei,
Worship Dance an tih te chu tunlai naupangte chuan an hre hle. Pathian fakna kawng hrang hrang awm thei zingah taksa chetna (lam) hmanga fak hi a lar hle a. Naupang deuh tan chuan zaikhawmnaa lam ringawt hi a tawk zo lo va, chutiang chu an tuipui pha em em lo bawk. Pathian hla awmsa rem tura han lam hah hah hi tunlai naupangte chuan nuam an ti a, Pathian fakna thuk tak an neih theihna kawng a ni bawk.
Hla ni tho si, story behchhan nei hmanga lem chang pah deuh chunga lam rual hi thil phurawm leh hmuhnawm tak a ni thei. Hetiang chi hi chu lam thiam ringawt piah lamah lemchan thiamna nena tih ngai a ni. Naupangte hian an zir tak tak chuan tih thiam loh tak tak hi an lo nei lem lo. Perfection erawh chu a awm mawh a, an level tawk teah zir thiam thei tura Pathian siam an nih angin enkawl dan azir zelin an insawr chhuak thin.
Nuchhungi English Medium School, Hnahthial hian theih tawp chhuahin zirlaiten kawng hrang hranga hma an sawnna tur a ngaihtuah reng thin. Zirna leh mawng sawi inzirtir chu a inpersanah mi thenkhat chuan an ngai maithei. Mihring nun hi complicated tak a ni a, kal khat lutuka mi a kal chuan a famkim loh dan a nasa uchuak bik thin. ‘All round development’ tih hi vawn reng tur a ni a, tui zawng leh ngainat nei hrang theuh Mihring kan nih avang hian zirtirtu chuan rilru zau tak a put a ngai thin a. Ama tui zawng a ni chiah lo a nih pawhin mi dang a ngaihtuah tel a ngai a, tui lo chung pawha a tui chawp ve a ngai thin. Mi pakhatin a ngaihsan hi mi dangin a ngaisang ve kher lo. Eng challenge pawh hmachhawn thei tura naupangte enkawl leh zirtir hi zirna School-te mawh a ni.
Mizo school boys and girls – they know how to sing
Mizote hi zai ngaina hnam tiin kan sawi thin. A nihna takah chuan hnam tin hi zai tel lovin kan awm thei lo. Lungngaih leh hlim ni-ah mihring rilru hrehawmna chhawk nan emaw hlimna puan chhuah nan zai hi a serh zinga a mei ang a ni a, mi lungngai rilru ruak leh phurna nasa tak neite tan zaithiamte hi an hlu a, kan ngaisang a, Mizo chhul chhuak chhuanawm tak tak kan nei a, Mizo celebrity tam ber pawh hi zaithiam an nih vanga mi hriat hlawh an ni. Zirtir fe pawha a ngaihna awm lo khawpa aw chhia leh a thente phei chu kel be ai pawha ngaihthlak peihawm lo khawpa zai thiam lo a awm theih a. Chutih rualin training leh inkaihhruaina tha pek chuan lar chhuak thei tur khawpa talent nei tha an awm bawk. Puitlin hnua hmalakna neih tan chauh hi kawng hrang hrangah a tlai thei thin a, duhthusam chuan naupan tet lai atanga inzirtirna mumal pek hi zirlaite hmakhua atan thil tangkai tak a ni.
A mipa ber hi a pumrua chu a te bik hle. Mahse, a zaithiamna kawngah chuan pa lian tak a ni reuh. Hmeichhe pahnih inchen dun takte hi chu lian zawk an nih angin mipa ber hi han laitat ta zawk se an din danah chuan a mawi zawk maithei. Heng hmeichhia-te hian an zaithiamna timawi lehzual tura an telh ve pawh a ni chuang lo. Amah hian a phu ve hrim hrim a ni zawk. Hmarcha pawh a te apiang a thak an tih ang deuh khan a taksa en ngawt atanga zuam sual awl tak a ni reuh. Eng hna thawk pawh ni ila, sawrkar hna sang leh lian ber thawk atanga Mizo rawra chhu leh mi ek uih paihtu thleng mai hian an thlalak tel lo chung pawhin chhungkua leh mahni chauha zai nalh tak tak ngaihthlak chak riau leh tuipui riau lai nei kan ni vek a, kan nun bawm ruak hnawh khat tur leh kan phurna mil tur hla tha leh a sa nalh thiam zaithiam kan mamawh zel dawn a ni.
Live music ngatin, mahnia music intum chawp vekin tunlai Mizo hla lar tak tak an sa thei. Naupang te e ti lo chuan an music pawh a ngaihthlak tlak ve viau. Zai lama intihsiakna Mizo idol leh Mizo icon te bakah competition hrang hrang khawi lai laiah emaw huaihawt a ni thin a. Music track hmanga zai hla rem ringawt ai chuan live ngeia han rem theih hi changkanna pakhatah kan ngai ta a, a ngaithlatu tan pawh a hmuhnawmin a ngaihnawm dangdai ve reng reng. Hetianga hla sa thei tur chuan zai thiam viau ringawt bakah music lam pawh thiam a ngai khawp a, chuvangin solfa thleng pawh hian zirtir an ngai. Tun hma chuan school-ah solfa an inzirtir thin a, chuvangin lehkhathiam deuh ik chu solfa thiam an ni tel tlangpui thin a, kohhranah pawh an tangkai hle thin. Tunah erawh thil a danglam zo ta.
Nuchhungi English Medium School pawh hian solfa pawimawhzia hriain a remchan ang zelin zirlaite hi solfa zirtir an ni a, English leh Mizo hla thar nalh tak tak zirtir an ni bawk thin. Zirtirtuten lal hrawt ngawt lo hian zirlaite mil tawk zela zirtirna pek kawngah than len zel tum zawk se la, Mizoram tan mi chhuanawm an ni zawk ngei ang.
Nuchhungi English Medium School atanga lo zir chhuak tawk Esther Lalpekhlui (Essy) chu Mizo Idol Contest-ah top tep a thleng pha a, Idol-a a tel hnu hian music video siamin Zonet-in thazual 10 an siam thinah hun eng emaw chhung chu he a hla hian chart-ah pakhatna a hauh a, a hla sak zingah ‘Inchhuang mai lo la‘ tih leh ‘Hey’ tihte chuan hriat a hlawh zual. Kan alumni zingah zai lama hetiang thleng thei kan nei hi kan lawm hle. Mizo Idol-a a tel hma pawhin Hnahthial khawchhunga programme hrang hrang buatsaihnaah a zai thin a, khawtlang tan a talent a hmang chhuak nasa hle a, hlawkna um lovin a zai fo thin. Alumni zinga mi a nih angin Hnahthial hmuna District demand puala Public Meeting neihnaa a zai lai thlalak hi dah ve ila.
Mizo chool girls in traditional attire
Mizo hnam incheina, Mizo traditional dress hi a lo nalh ber mai. Mizo sunday dress atan pawh a iai-awm awm loh e.Tunlai hmeichhe tam tak chuan kan Mizona bosal vek khawpin an incheina leh awm danah hnam dang zia an la nasa a, School naupangte hi nunphung leh hnam ziarang zirtir an ngai hle. Mawina leh duhawmna hi pawnlam lang theiah chauh a awm lo nain thawmhnaw inbel hian mihring mizia a tarlang ve fo tho bawk. A hmei a pa hian kan hnam hlutna leh ropuina hi chhawm nung zel tur chuan mahni hnam zahpui lova nitin khawsak danah leh kan incheinaah hian Mizo zia lantir zel kan tum a tul a, school zirtirtute pawh hian classroom zirna ringawt piah lamah hetiang nun dan tha hi naupangte hnenah an zirtir zel a tul ta a ni.
Computer-a thil chhut chu sawi loh Mizo SMS pawh chhu thiam tha thum lo chuan thing nih an hlawh zung zungna leh an buk a zan em emna khawvelah hian Mizo thangthar mipa leh hmeichhia tuaitirte hi kaihhruaina tha tak hnuaia dah a pawimawh tulh tulh dawn a ni. Mizo zirlai naupangte hian nunphung tha lo tam tak an entawn theih mai hi an bulah velah hmuh tur an nei reng a, hetiang thil fel lo tam tak, mihring zahawmna tichhe vek thei leh nunphung pangngai lo lutuk laka inthiarfihlim tura zirlaite kaihhruai hi school hian a hna pawimawh ber pakhat a ni. Mihring rilru piangsual hrim hrim chu a awm theih a ni mai thei a, mahse, tam tak hi chu enkawlna hmanga ven leh siamthat thetih a ni a, ngaihtuah phak bak piah lam thil an tawn hma, zirlai naupang an nih lai hi an tan hun pawimawh tak a va ni em !
Lanna tlang dang
Mizo hmeichhia leh hockey
Mizo hmeichhiate hi hockey lamah hian an duai lo hle tih kan hre thin a, sport discipline dang ai hian tih tak zeta bei tan chuan hockey-ah hian hlawhtlinna chance a tam zawk awm e. Mahse, a tlangpui thuin Mizo thalai zingah hockey hian ngaihsan a hlawh ta lem lo niin a lang.
Tlema han hrual deuh chuan Mizo hmeichhia-te hian hockey hi an khel thei fu zel si a, talent nei tha deuh tal hi chu zirtirna tha tak hnuaia hrual chuan Mizo tihmingthatu an ni thei ngeiin a rinawm. School level-ah pawh hian a theih ang leh remchan ang zela hockey hi chawisan a, Mizo naupang leh tleirawlte chher chhoh zel hi a tul hle. Nuchhungi English Medium School hmeichhe tleirawlte pawh hi hun tlem te chhunga han hrual hlek pawhin rin ai takin an khel ve thei phian zel mai. Mizo Hmeichhe zingah Mizo super model emaw, miss Mizoram contest leh Mizoram fashion show vela tel lo tur chi tan pawh pian nalh leh hmeltha nih a tul em em lohna hmun a ni a, remchang lak thiam chuan mahni intun nunna kawng tha tak a ni thei ngei ang. Inkhel tak tak tur erawh chuan hrisel that leh taksa leh rilru vawn fit reng a ngai a, chu chu infiamnain a ken tel thil tha tak a ni. Hmeichhia te tiangkawm nena han inkhelh deuh rap rap hi a nu zan lo a ni thei. Tunlai Mizo mipa inzai no siak ang em chu a ni lo. Inkhel en peih tamna ramah hian a hlu a ni. Hmeichhe chakna thahrui (strength of women) sawr chhuah dan ngaihtuah kawngah leh Mizo hmeichhe phur zawng dapna zawnna kawngah school zirtirtu leh school naupangte an tanrual a, hmeichhe mizia leh theihna thlir chunga Mizo nula tiphur thei zawnga inkaihhruaina tha neih a tul. Phurna leh tumruhna tel lo chuan game khelh prihawm loh tak a ni thei. Hockey stick hrim hrim hi Mizo hmeichhiate, a bikin Mizo nula hian an khal tam lo hle a, school bila sticks nei lo hi a tam zawk an ni maithei. Hei vang hian hockey lama hmeichhiate theihna kan hmu chhuak nep hle. Hmalam pana bawh ruak ruak hi kan tih makmawh niin a lang. Continue reading
Nuchhungi English Medium School, Hnahthial 
